მეზობლების პოლიტიკით უკმაყოფილო რუსეთი კვლავ თავის მთავარ იარაღს იყენებს. საქართველოს, ბელარუსისა და მოლდოვის პროდუქციის შემდეგ ემბარგო უკრაინულ და ნორვეგიულ პროდუქციასაც შეეხო. გენადი ონიშენკომ ხელი მოაწერა განკარგულებას, რომლის თანახმადაც ქვეყანაში უკრაინული ყველის შეტანა იკრძალება. მიზეზად რუსეთის მთავარი სანიტარი ტრადიციულად პროდუქციის უხარისხობას ასახელებს. ონიშენკოს უწყება ემბარგოს უმზადებს ნორვეგიელ მიმწოდებლებსაც.

სანიტარული სამსახურის ხელმძღვანელის თქმით, შემოწმებამ ნორვეგიულ თევზეულში ნაწლავური ჩხირების შემცველობა გამოავლინა და ამის შესახებ პარტნიორებს უკვე ოფიციალური წერილით მიმართა.

საქართველოს განათლებისა და მეცნიერების მინისტრის დიმიტრი შაშკინის ბრძანების საფუძველზე, დიდთოვლობასთან დაკავშირებით, საქართველოს მთელ ტერიტორიაზე საჯარო სკოლებში სასწავლო პროცესი 2012 წლის 9 თებერვლიდან შეჩერდება და 2012 წლის 13 თებერვალს განახლდება, ხოლო 2012 წლის 8 თებერვალს გაცდენილი საათები მოსწავლეებს საპატიოდ ჩაეთვლებათ. გაცდენილი დღეებისა და საათების ანაზღაურება შაბათის ხარჯზე მოხდება.

იერუსალიმში მემარჯვენე ექსტრემისტებმა ჯვრის მონასტერი შეურაცხყვეს. ტაძარის გალავანზე, სადაც შოთა რუსთაველის ფრესკაცაა შემორჩენილი, ექსტრემისტებმა ქრისტიანებისთვის შეურაცხმყოფელი წარწერები დატოვეს.

ამგვარად დაჯგუფება, რომელიც საკუთარ თავს იუდა მაკაბელის შთამომავლად და მიმდევრად მიიჩნევს, ისრაელის პარლამენტის გადაწყვეტილებას აპროტესტებს პალესტინასთან სადავო ტერიტორიებზე უკანონო ებრაული დასახლებების დემონტაჟის შესახებ.

წარწერები ივრითზე და ბერძნულ ენაზე მხოლოდ მონასტრის გალავნის კედელზე და ავტომობილებზეა გაკეთებული. ფრესკები არ დაზიანებულა. ეს რ არის პირველი შემთხვევა, როდესაც მემარჯვენე ექსტრემისტები წმინდა ადგილებს შეურაცხყოფენ. მათ ანალოგიური წარწერები რამდენიმე მეჩეთზე, სინაგოგაზე და ისრაელის პრემიერის იცხაკ რაბინის მემორიალზეც დატოვეს.

რუსული დიპლომატია სკანდალში გაეხვია. გაეროში რუსეთის მუდმივი ელჩი ვიტალი ჩურკინი კატეგორიულად უარყოფს მედიით გავრცელებულ ინფორმაციას, თითქოს იგი უშიშროების საბჭოს სხდომაზე კატარის პრემიერ-მინისტრს დაემუქრა.

საქმე ეხება გასულ კვირას გაეროში კენჭისყრას სირიის საკითხზე, სადაც კატარის საგარეო საქმეთა მინისტრმა რუს ელჩს განუცხადა, რომ ვეტოს დადების შემთხვევაში, იგი არაბულ ქვეყნებთან ურთიერთობას გაიფუჭებდა. ჩურკინმა კი უპასუხა: `თუ ასეთი ტონით ისაუბრებდა, კატარი მეორე დღემდეც ვერ გასტანდა`.

მოგვიანებით ჩურკინმა ამ ინფორმაციას ბინძური პროვოკაცია უწოდა და განაცხადა, რომ უშიშროების საბჭოს რეზოლუციას რუსეთი ვეტოს არ დაადებდა, განხილვა კიდევ რამდენიმე დღე რომ გაგრძელებულიყო.

დიდთოვლობის გამო, დღეს დილიდან შეფერხებით მოძრაობს ტრანსპორტი კახეთის მიმართულებით, სადაც საგზაო დეპარტამენტის ინფორმაციით, შეიუზღუდა ნახევრადმისაბმელიანი და მისაბმელიანი ტრანსპორტის მოძრაობა. საქართველოს მასშტაბით ყველა ცენტრალური მაგისტრალი თავისუფალია. ბოლო ინფორმაციით, ზვავსაშიშროების გამო, კვლავ ჩაიკეტა ჯვრის უღელტიხილი, შესაბამისი სამსახურები 24-საათიან რეჟიმში მუშაობენ.

თბილისში თოვლის საფარმა უკვე ათ სანტიმეტრს გადააჭარბა. დედაქალაქში მთელი ღამის განმავლობაში თოვდა, თუმცა გადაადგილების მხრივ მძღოლებს სერიოზული პრობლემები არ შექმნიათ. თბილისის დასუფთავების სამსახური მუშაობის საგანგებო რეჟიმზეა გადასული. ამ დროისათვის ტექნიკური მარილი ყველა ცენტრალურ ქუჩაზეა დაყრილი. სპეციალისტების თქმით, ასეთი თოვლი თბილისში თითქმის ათი წელია არ ყოფილა.

კლიმატურ ცვლილებებს სინოპტიკოსები გლობალურ დათბობას უკავშირებენ, რასაც დედამიწის ზედაპირზე ტემპერატურის აწევა მოჰყვა. სპეციალისტთა განმარტებით, თითქოსდა უმნიშნველო ცვლილებამ - 0,7 გრადუსით მატებამ კლიმატური რეჟიმი შეცვალა.

სპეციალისტები გახშირებულ სტიქიურ მოვლენებს სწორედ გლობალური დათბობის პროცესს უკავშირებენ. დღეიდან ამინდი საქართველოში კვლავ გაუარესდება. თოვა საქართველოს მთელს ტერიტორიაზეა მოსალოდნელი. შენარჩუნდება ყინვაც. ტემპერატურა თბილისში -7 გრადუსამდე დაეცემა, აღმოსავლეთ საქართველოში -14, დასავლეთში კი -2 გრადუსი იქნება. უამინდობა საქართველოში 12 თებერვლამდე გასტანს.

კიდევ ერთი ახალი საავადმყოფო – დუშეთში ახალი კლინიკა სადაზღვევო კომპანია ჯიპიაიმ გახსნა. ის 15-საწოლიანია. აღჭურვილია თანამედროვე აპარატურით და აქ ყველა სამედიცინო განყოფილება ფუნქციონირებს. საავადმყოფოში 80 მედიკოსია დასაქმებული. მიხეილ სააკაშვილმა დღეს დუშეთის საავადმყოფო პირადად დაათვალიერა. მოინახულა ახალშობილები მშობლებთან ერთად და საჩუქრები გადასცა. პრეზიდენტმა დუშეთის ახლად გახსნილ საავადმყოფოში პედიატრ ირაკლი ციციშვილს ბრწყინვალების საპრეზიდენტო ორდენი გადასცა.

`მე მინდა ყველა ჩვენგანის სახელით დიდ ქართველ მოღვაწეს, მედიკოსს, ბავშვების გადამრჩენელს და მთელი თაობების აღმზრდელს, საქართველოს გენოფონდის ძალიან ღვაწლმოსილ დამცველს, დიდ ქართველ პედიატრს,  ბატონ ირაკლი ციციშვილს გადავცე ბრწყინვალების ორდენი, როგორც ჩვენი დიდი მადლიერების და მისი დიდი ღვაწლის ხაზგასმა ქართული სახელმწიფოს მხრიდან,`- აღნიშნა პრეზიდენტმა.

მანამდე კი მიხეილ სააკაშვილი მოსახლეობას შეხვდა.

ოკუპირებული სამხრეთ ოსეთის ეგრეთ წოდებულ საპრეზიდენტო არჩევნებში დიმიტრი მედოევიც მიიღებს მონაწილეობას. ამის შესახებ მარიონეტული რეჟიმის ელჩმა რუსეთში BBC-სთვის მიცემულ ინტერვიუში განაცხადა.

დიმიტრი მედოევმა აღნიშნა, რომ მისი კანდიდატურის წამოყენებას 300 კაციანმა საინიციატივო ჯგუფმა დაუჭირა მხარი. BBC აღნიშნავს, რომ დიმიტრი მედოევი 2008 წლის რუსეთ-საქართველოს ომის შემდეგ რუსეთში სამხრეთ ოსეთის ელჩად მუშაობს და იმის გათვალისწინებით, რომ მას რუს ჩინოვნიკებთან მჭიდრო კავშირი აქვს, პოლიტოლოგების ნაწილი მედოევს კრემლის კანდიდატად განიხილავს.

მოსკოვის წინა რჩეული ანატოლი ბიბილოვი ნოემბერში ჩატარებულ ე.წ. არჩევნებში ალა ჯიოევასთან დამარცხდა. შედეგები გააუქმეს, რის შემდეგაც ხელახალი ე.წ. არჩევნები 25 მარტისთვის დაინიშნა. ბიბილოვმა მონაწილეობაზე უარი განაცხადა, ხოლო ჯიოევა კი თავს ლეგიტიმურ პრეზიდენტად მიიჩნევს და 10 თებერვალს ინაუგურაციის ჩატარებასაც გეგმავს.

ვლადიმერ პუტინი მომხრეა ჩრდილო-ატლანტიკური ალიანსი დაიშალოს. ამ განცხადებით რუსეთის პრემიერი ვლადიმერ ჟირინოვსკის ინიციატივას გამოეხმაურა და ლიბერალ-დემოკრატიული პარტიის ლიდერი შეაქო.

პოლიტოლოგებთან გამართული შეხვედრისას პრემიერმა განაცხადა, რომ ნატო ცივი ომის გადმონაშთია და ის არავის სჭირდება, თუმცა რუსეთის პრემიერი არ დაეთანხმა ჟირინოვსკის იდეას - რუსეთმა ევროკავშირს ნატოს დაშლის სანაცვლოდ ფინანსური მხარდაჭერა აღმოუჩინოს. პუტინი ამბობს, რომ ევროკავშირის რამდენიმე ქვეყანა რუსეთზე მდიდარია.

ვლადიმერ პუტინი მომხრეა ჩრდილო-ატლანტიკური ალიანსი დაიშალოს. ამ განცხადებით რუსეთის პრემიერი ვლადიმერ ჟირინოვსკის ინიციატივას გამოეხმაურა და ლიბერალ-დემოკრატიული პარტიის ლიდერი შეაქო.

პოლიტოლოგებთან გამართული შეხვედრისას პრემიერმა განაცხადა, რომ ნატო ცივი ომის გადმონაშთია და ის არავის სჭირდება, თუმცა რუსეთის პრემიერი არ დაეთანხმა ჟირინოვსკის იდეას - რუსეთმა ევროკავშირს ნატოს დაშლის სანაცვლოდ ფინანსური მხარდაჭერა აღმოუჩინოს. პუტინი ამბობს, რომ ევროკავშირის რამდენიმე ქვეყანა რუსეთზე მდიდარია.